7575   ffor thou shalt for this synne dwelle
7576   Right in the devels ers of helle,
7577   But if that thou repente thee.'
7578   'Mafay, thou liest falsly!' qd he.
7579   'What? welcome with myschaunce nowe!
7580   Have I therfore herberd yowe
7581   To seye me shame, and eke reprove?
7582   With sory happe, to youre bihove,
7583   Am I to day youre herbegere!
7584   Go, herber yow elles where than heere,
7585   That han a lyer called me!
7586   Two tregetours art thou and he,
7587   That in myn hous do me this shame,
7588   And for my sothe saugh ye me blame.
7589   Is this the sermoun that ye make?
7590   To all the develles I me take,
7591   Or elles, god, thou me confounde!
7592   But er men diden this castel founde,
7593   It passith not ten daies or twelve,
7594   But it was tolde right to my selve,
7595   And as they seide, right so tolde I,
7596   He kyst the Rose pryvyly!
7597   Thus seide I now, and have seid yore;
7598   I not where he dide ony more.
7599   Why shulde men sey me such a thyng,
7600   If it hadde bene gabbyng?