7215   And Empis my moder is,
7216   Maugre the holy gost, iwis.
7217   Oure myghty lynage and our rowte
7218   Regneth in every regne Aboute;
7219   And well is worthy we mynystres be,
7220   ffor all this world governe we,
7221   And can the folk so wel disceyve,
7222   That noon oure gile can pceyve;
7223   And though they done, they dar not sey;
7224   The sothe dar no wight bywrey.
7225   But he in cristis wrath hym ledith,
7226   That more than crist my britheren dredith.
7227   He nys no full good champioun,
7228   That dredith such similacioun;
7229   Nor that for peyne wole refusen
7230   Us to correcte and Accusen.
7231   He wole not entremete by right,
7232   Ne have god in his iye sight,
7233   And therfore god shal hym punyshe;
7234   But me ne rekke of no vice,
7235   Sithen men us loven comunably,
7236   And holden us for so worthy,
7237   That we may folk repreve echoon,
7238   And we nyl have repref of noon.