6949   Yhe, sikerly, though he it feyned,
6950   Or that hym list, or that hym deyned
6951   A man thurgh hym avaunced be;
6952   Therof all pceners be we,
6953   And tellen folk, where so we go,
6954   That man thurgh us is sprongen so.
6955   And forto have of men preysyng,
6956   We purchace, thurgh oure flateryng,
6957   Of riche men, of gret pouste,
6958   Lettres, to witnesse oure bounte;
6959   So that man weneth, that may us see,
6960   That all vertu in us be.
6961   And alwey pore we us feyne;
6962   But how so that we begge or pleyne,
6963   We ben the folk, without lesyng,
6964   That all thing have without havyng.
6965   Thus be we dred of the puple, iwis.
6966   And gladly my purpos is this:
6967   I dele with no wight, but he
6968   Have gold and tresour gret plente;
6969   Her acqueyntaunce wel love I;
6970   This is moche my desire, shortly.
6971   I entremete me of brokages,
6972   I make pees and mariages,