![Manuscript](../img_360/120r_360.jpg) |
6037 Late ladies worthe with her thyngis,
6038 They shal hem telle so fele tidynges,
6039 And moeve hem eke so many requestis
6040 By flateri, that not honest is,
6041 And therto yeve hym such thankynges,
6042 What with kissyng, and with talkynges,
6043 That certis, if they trowed be,
6044 Shal never leve hem londe ne fee
6045 That it nyl as the moeble fare,
6046 Of which they first delyverid Are.
6047 Now may ye telle us all youre wille,
6048 And we youre heestes shal fulfille.
6049 'But falsseblant dar not, for drede
6050 Of you, sir, medle hym of this dede,
6051 ffor he seith that ye ben his foo;
6052 He note, if ye wole worche hym woo.
6053 Wherfore we pray you alle, beausire,
6054 That ye forgyve hym now your ire,
6055 And that he may dwelle, as your man,
6056 With abstinence, his dere lemman:
6057 This oure accord and oure wille nowe.'
6058 'Parfay,' seide love, 'I graunte it yowe;
6059 I wole wel holde hym for my man;
6060 Now late hym come:' and he forth ran.
|