6013   Therfore I must his socour be,
6014   That peyneth hym to serven me;
6015   ffor if he deide for love of this,
6016   Thanne semeth in me no love ther is.'
6017   'Sir,' seide they, 'soth is, every deel,
6018   That ye reherce, and we wote wel
6019   Tilk oth to holde is resonable;
6020   ffor it is good and covenable,
6021   That ye on riche men han sworne.
6022   ffor, sir, this wote we wel biforne;
6023   If riche men done you homage,
6024   That is as fooles done outrage;
6025   But ye shull not forsworne be,
6026   Ne lette therfore to drynke clarre,
6027   Or pyment makid fresh and newe.
6028   Ladies shull hem such pepir brewe,
6029   If that they fall into her laas,
6030   That they for woo mowe seyn "allas!"
6031   Ladyes shullen evere so curteis be,
6032   That they shal quyte youre oth all free.
6033   Ne sekith never othir vicaire,
6034   ffor they shal speke with hem so faire
6035   That ye shal holde you paied full wele,
6036   Though ye you medle never a dele.