5989   Oure maydens shal eke pluk hym so,
5990   That hym shal neden fetheres mo,
5991   And make hym selle his londe to spende,
5992   But he the bet kunne hym defende.
5993   'Pore men han maad her lord of me;
5994   Al though they not so myghty be,
5995   That they may fede me in delite,
5996   I wole not have hem in despite.
5997   No good man hateth hym, as I gesse,
5998   ffor chynche and feloun is richesse,
5999   That so can chase hym and dispise,
6000   And hem defoule in sondry wise.
6001   They loven full bet, so god me spede,
6002   Than doth the riche, chynchy grede,
6003   And ben, in good feith, more stable
6004   And trewer, and more serviable;
6005   And therfore it suffisith me
6006   Her good herte, and her beaute.
6007   They han on me sette all her thought,
6008   And therfore I forgete hem nought.
6009   I wole hem bringe in grete noblesse,
6010   If that I were god of Richesse,
6011   As I am god of love, sothely,
6012   Sich routhe upon her pleynt have I.