![Manuscript](../img_360/104r_360.jpg) |
5269 And socoure hym, whanne he hath neede,
5270 In all that he may done in deede;
5271 And gladder that he hym plesith
5272 Than his felowe that he esith.
5273 And if he do not his requeste,
5274 He shal as mochel hym moleste
5275 As his felow, for that he
5276 May not fulfille his volunte
5277 ffully as he hath requered.
5278 If bothe the hertis love hath fered,
5279 Ioy and woo they shull departe,
5280 And take evenly ech his parte.
5281 Half his anoy he shal have Ay,
5282 And comfort what that he may;
5283 And of this blisse parte shal he,
5284 If love wole departed be.
5285 'And whilom of this unyte
5286 Spake Tulius in a ditee;
5287 And shulde maken his requeste
5288 Unto his freend, that is honeste;
5289 And he goodly shulde it fulfille,
5290 But it the more were out of skile,
5291 And other wise not graunte therto,
5292 Except oonly in cause twoo:
|