5055   Be she mayde, be she wyf,
5056   That quyk wole selle hir, bi hir lyf.
5057   Hou faire chere that evere she make,
5058   He is a wrecche, I undirtake,
5059   That loved such one, for swete or soure,
5060   Though she hy calle hir paramoure,
5061   And laugheth on hym, and makith hym feeste.
5062   ffor certeynly no such beeste
5063   To be loved is not worthy,
5064   Or bere the name of drurie.
5065   Noon shulde hir please, but he were woode,
5066   That wole dispoile hym of his goode.
5067   Yit nevertheles, I wole not sey
5068   That she, for solace and for pley,
5069   May a iewel or other thyng
5070   Take of her loves fre yevyng;
5071   But that she aske it in no wise,
5072   ffor drede of shame of coveitise.
5073   And she of hirs may hym, certeyn,
5074   Withoute sclaundre, yeven Ageyn,
5075   And ioyne her hertes togidre so
5076   In love, and take and yeve Also.
5077   Trowe not that I wolde hem twynne,
5078   Whanne in her love ther is no synne;