4243   And walken oft upon the wall,
4244   Corners and wikettis over All
4245   fful narwe serchen and espie;
4246   Though he nought fonde, yit wole he lye.
4247   Discordaunt ever fro Armonye,
4248   And distoned from melodie,
4249   Controve he wolde, and foule fayle,
4250   With hornepipes of Cornewaile.
4251   In floytes made he discordaunce,
4252   And in his musyk, with myschaunce,
4253   He wolde seyn, with notes newe,
4254   That he fonde no womman trewe,
4255   Ne that he saugh never, in his lyf,
4256   Unto hir husbonde a trewe wyf;
4257   Ne noon so ful of honeste,
4258   That she nyl laughe and mery be
4259   Whanne that she hereth, or may espie,
4260   A man speken of leccherie.
4261   Everiche of hem hath somme vice;
4262   Oon is dishonest, another is nyce;
4263   If oon be full of vylanye,
4264   Another hath a likerous ighe;
4265   If oon be full of wantonesse,
4266   Another is a chideresse.