4099   Of the roser all Aboute;
4100   He shitteth every man withoute.
4101   Thus day by day daunger is wers,
4102   More wondirfull and more dyvers,
4103   And feller eke than evere he was;
4104   ffor hym full ofte I synge 'allas!'
4105   ffor I ne may nought, thurgh his ire,
4106   Recovere that I moost desire.
4107   Myne herte, allas, wole brest a twoo,
4108   ffor Bialacoil I wratthed soo.
4109   ffor certeynly, in every membre
4110   I quoke, whanne I me remembre
4111   Of the bothom, which I wolde
4112   ffull ofte a day sene and biholde.
4113   And whanne I thenke upon the kisse,
4114   And how mych Ioye and blisse
4115   I hadde thurgh the savour swete,
4116   ffor wante of it I grone and grete.
4117   Me thenkith I fele yit in my nose
4118   The swete savour of the rose.
4119   And now I woot that I mote goo
4120   So fer the fresh floures froo,
4121   To me full welcome were the deeth;
4122   Absens therof, allas, me sleeth!