4075   I have do folie, now I see,
4076   But now it shall amended bee.
4077   Who settith foot heere ony more,
4078   Truly, he shall repente it sore;
4079   ffor no man moo into this place
4080   Of me to entre shal have grace.
4081   Lever I hadde, with swerdis tweyne
4082   Thurgh oute myne herte, in evy veyne
4083   Perced to be, with many a wounde,
4084   Thanne slouthe shulde in me be founde.
4085   ffrom hennes forth, by nyght or day,
4086   I shall defende it, if I may,
4087   Withouten ony excepcioun
4088   Of ech maner condicioun;
4089   And if I it eny man graunte,
4090   Holdeth me for recreaunte.'
4091   Thanne daunger on his feet gan stonde,
4092   And hente a burdoun in his honde.
4093   Wroth in his ire, ne lefte he nought,
4094   But thurgh the verger he hath sought.
4095   If he myght fynde hole or trace,
4096   Where thurgh that me mote forth by pace,
4097   Or ony gappe, he dide it close,
4098   That no man myght touche a rose