4051   And chased awey, with gret manace,
4052   Bialacoil oute of this place,
4053   And swereth shortly that he shall
4054   Enclose hym in a sturdy wall;
4055   And all is for thi wikkednesse,
4056   ffor that thee faileth straungenesse.
4057   Thyne herte, I trowe, be failed All;
4058   Thou shalt repente in speciall,
4059   If Ielousie the sooth knowe;
4060   Thou shalt forthenke, and sore rewe.'
4061   With that the cherl his clubbe gan shake,
4062   ffrounyng his eyen gan to make,
4063   And hidous chere; a man in rage,
4064   ffor ire he brente in his visage.
4065   Whanne that herd hym blamed soo,
4066   He seide, 'Oute of my witte I goo;
4067   To be discomfyt I have gret wronge.
4068   Certis, I have now lyved to longe,
4069   Sith I may not this closer kepe;
4070   All quykke I wolde be dolven deepe,
4071   If ony man shal more repeire
4072   Into this gardyne, for foule or faire.
4073   Myne herte for ire goth a fere,
4074   That I lete ony entre heere.