3715   She was not of religioun.
3716   Nor I nell make mencioun
3717   Nor of robe, nor of tresour,
3718   Of broche, neithir of hir riche Attour;
3719   Ne of hir girdill aboute hir side,
3720   ffor that I nyll not longe Abide.
3721   But knowith wel, that certeynly
3722   She was araied richely.
3723   Devoyde of pruyde certeyn she was;
3724   To Bialacoil she wente Apas,
3725   And to hym shortly, in a clause,
3726   She seide: 'sir, what is the cause
3727   Ye ben of port so daungerous
3728   Unto this lover, and deynous,
3729   To graunte hym no thyng but a kisse?
3730   To worne it hym ye done Amysse;
3731   Sith well ye wote, how that he
3732   Is loves servaunt, as ye may see,
3733   And hath beaute, wher through is
3734   Worthy of love to have the blis.
3735   How he is semely, biholde and see,
3736   How he is faire, how he is free,
3737   How he is swoote and debonaire,
3738   Of age yonge, lusty, and faire.