3091   So gret annoy, and such Affray,
3092   That I ne wote what I shall say;
3093   I drede youre wrath to disserve.
3094   Lever me were, that knyves kerve
3095   My body shulde in pecys small,
3096   Than in any wise it shulde fall
3097   That ye wratthed shulde ben with me.'
3098   'Sey boldely thi will,' quod he,
3099   'I nyl be wroth, if that I may,
3100   ffor nought that thou shalt to me say.'
3101   Thanne seide I, 'Sir, not you displease
3102   To knowen of myn gret unnese,
3103   In which oonly love hath me brought;
3104   ffor peynes gret, disese and thought,
3105   ffro day to day he doth me drye;
3106   Supposeth not, sir, that I lye.
3107   In me fyve woundes dide he make,
3108   The soore of whiche shall nevere slake
3109   But ye the bothom graunte me,
3110   Which is moost passaunt of beaute,
3111   My lyf, my deth, and my martire,
3112   And tresour that I moost desire.'
3113   Thanne Bialacoil, affrayed All,
3114   Seyde, 'sir, it may not fall;