2899   Wherfore thou prese alwey to be
2900   In place, where thou maist hir see.
2901   ffor it is thyng most Amerous,
2902   Most delytable and saverous,
2903   fforto aswage a mannes sorwe,
2904   To sene his lady by the morwe.
2905   ffor it is a full noble thing
2906   Whanne thyne eyen have metyng
2907   With that relike precious,
2908   Wherof they be so desirous.
2909   But al day after, soth it is,
2910   They have no drede to faren Amysse,
2911   They dreden neither wynde ne reyne,
2912   Ne noon other maner peyne.
2913   ffor whanne thyne eyen were thus in blisse,
2914   Yit of her curtesie, ywysse,
2915   Alloone they can not have hir ioye,
2916   But to the herte they conveye;
2917   Parte of her blisse to hym thou sende,
2918   Of all this harme to make an ende.
2919   The eye is a good messangere,
2920   Which can to the herte in such manere
2921   Tidyngis sende, that hath sene,
2922   To voide hym of his peynes clene.