2875   ffor resoun wole, he shewe to thee
2876   All uttirly his pryvyte;
2877   And what she is he loveth so,
2878   To thee pleynly he shal undo,
2879   Withoute drede of ony shame,
2880   Bothe tell hir renoun and hir name.
2881   Thanne shall he forther, ferre and nere,
2882   And namely to thi lady dere,
2883   In syker wise; yee, every other
2884   Shall helpen as his owne brother,
2885   In trouthe withoute doublenesse,
2886   And kepen cloos in sikernesse.
2887   ffor it is noble thing, in fay,
2888   To have a man thou darst say
2889   Thy pryve counsell every deell;
2890   ffor that wole comforte thee right well,
2891   And thou shalt holde thee well Apayed,
2892   Whanne such a freend thou hast Assayed.
2893   The thridde good of gret comforte
2894   That yeveth to lovers most disporte,
2895   Comyth of sight and of biholdyng,
2896   That clepid is swete lokyng,
2897   The which may noon ese do,
2898   Whanne thou art fer thy lady fro;