2635   ffor were it day, I wolde uprise.
2636   A! slowe sonne, shewe thine enprise!
2637   Spede thee to sprede thy beemys bright,
2638   And chace the derknesse of the nyght,
2639   To putte away the stoundes stronge,
2640   Whiche in me lasten all to longe.
2641   'The nyght shalt thou contene soo,
2642   Withoute rest, in peyne and woo;
2643   If evere thou knewe of love distresse,
2644   Thou shat mowe lerne in that sijknesse.
2645   And thus enduryng shalt thou lye,
2646   And ryse on morwe up erly
2647   Out of thy bedde, and harneyse thee
2648   Er evere dawnyng thou maist see.
2649   All pryvyly thanne shall thou goon,
2650   What whider it be, thi silf Alloon,
2651   ffor reyne, or hayle, for snowe, for slete,
2652   Thider she dwellith that is so swete,
2653   The which may fall aslepe be,
2654   And thenkith but lytel upon thee.
2655   Thanne shalt thou goon, ful foule Afeerd;
2656   Loke if the gate be unspered,
2657   And waite without in woo and peyne,
2658   ffull yvel a coolde in wynde and reyne.