2611   It were to me a grete guerdoun,
2612   Relees of all my passioun.
2613   But it is harde to come therto;
2614   All is but folye that I do,
2615   So high I have myne herte sette,
2616   Where I may no comfort gette.
2617   I wote not where I seye well or nought;
2618   But this I wote wel in my thought,
2619   That it were better of hir Alloone,
2620   fforto stynte my woo and moone,
2621   A loke on hir I caste goodly,
2622   That forto have, al utterly,
2623   Of an other all hoole the pley.
2624   A! lord! where I shall byde the day
2625   That evere she shall my lady be?
2626   He is full cured that may hir see.
2627   A! god! whanne shal the dawnyng springe?
2628   To liggen thus is an angry thyng;
2629   I have no ioye thus heere to lye
2630   Whanne that my love is not me bye.
2631   A man to lyen hath gret disese,
2632   Which may not slepe ne reste in ese.
2633   I wolde it dawed, and were now day,
2634   And that the nyght were went Away;