2563   Thine armys shalt thou sprede Abrode,
2564   As man in werre were forweriede.
2565   Thanne shall thee come a remembraunce
2566   Of hir shappe and hir semblaunce,
2567   Whereto none other may be pere.
2568   And wite thou wel, withoute were,
2569   That thee shal se, somtyme that nyght,
2570   That thou hast hir, that is so bright,
2571   Naked bitwene thyne armes there,
2572   All sothfastnesse as though it were.
2573   Thou shalt make castels thanne in spayne,
2574   And dreme of ioye, all but in vayne,
2575   And thee deliten of right nought,
2576   While thou so slomrest in that thought,
2577   That is so swete and delitable,
2578   The which, in soth, nys but fable,
2579   ffor it ne shall no while laste.
2580   Thanne shalt thou sighe and wepe faste,
2581   And say, "Dere god, what thing is this?
2582   My dreme is turned all Amys,
2583   Which was full swete and Apparent,
2584   But now I wake, it is al shent!
2585   Now yede this mery thought Away!
2586   Twenty tymes upon a day