2491   That thou, so dulle in every thing,
2492   Were dome for drede, with oute spekyng.
2493   Thou shalt eke thenke thou didest folye,
2494   That thou were hir so fast bye,
2495   And durst not auntre thee to say
2496   Som thyng, er thou cam Away;
2497   ffor thou haddist nomore wonne,
2498   To speke of hir whanne thou bigonne:
2499   But yitt she wolde, for thy sake,
2500   In armes goodly thee have take,
2501   It shulde have be more worth to thee
2502   Than of tresour gret plente.
2503   'Thus shalt thou morne and eke compleyne,
2504   And gete enchesoun to goone Ageyne
2505   Unto thi walke, or to thi place,
2506   Where thou biheelde hir fleshly face.
2507   And never, for fals suspeccioun,
2508   Thou woldest fynde Accasioun
2509   fforto gone unto hire hous.
2510   So art thou thanne desirous
2511   A sight of hir forto have,
2512   If thou thine honour myghtist save,
2513   Or ony erande myghtist make
2514   Thider, for thi loves sake;