2467   The more thine herte brenneth in fier,
2468   The more thine herte is in desire.
2469   ffor who considreth every deell,
2470   It may be likned wondir well,
2471   The peyne of love, unto a fere;
2472   ffor evermore tho neighest nere
2473   Thought, or whoo so that it bee,
2474   ffor verray sothe I tell it thee,
2475   The hatter evere shall thou brenne,
2476   As expience shall thee kenne.
2477   Where so comest in ony coost,
2478   Who is next fuyre, he brenneth moost.
2479   And yitt forsothe, for all thine hete,
2480   Though thou for love swelte and swete,
2481   Ne for no thyng thou felen may,
2482   Thou shalt not willen to passen Away.
2483   And though thou go, yitt must thee nede
2484   Thenke all day on hir fairhede,
2485   Whom thou biheelde with so good will;
2486   And holde thi silf biguyled ill,
2487   That thou ne haddest noon hardement
2488   To shewe hir ought of thyne entent.
2489   Thyn herte full sore thou wolt dispise,
2490   And eke repreve of cowardise,