1723   He toke an arowe full sharply whette,
1724   And in his bowe whanne it was sette,
1725   He streight up to his ere drough
1726   The stronge bowe, that was so tough,
1727   And shette att me so wondir smert,
1728   That thorough me nye unto myn herte
1729   The takel smote, and depe it wente.
1730   And ther with all such colde me hente,
1731   That, under clothes warme and softe,
1732   Sithen that day I have chevered ofte.
1733   Whanne I was hurt thus in stounde,
1734   I felle doun platte unto the grounde.
1735   Myn herte failed and feynted Ay,
1736   And long tyme a swone I lay.
1737   But whanne I come out of swonyng,
1738   And hadde witt, and my felyng,
1739   I was all maate, and wende full well
1740   Of bloode have loren a full gret dell.
1741   But certes, the arowe that in me stode
1742   Of me ne drewe no drope of blode,
1743   ffor why I founde my wounde all drie.
1744   Thanne toke I with myn hondis tweie
1745   The arowe, and ful fast out it plight,
1746   And in the pullyng sore I sight.