![Manuscript](../img_360/029v_360.jpg) |
1555 The clere water in the stoon,
1556 And eke the gravell, which that shoon
1557 Down in the botme, as silver fyn;
1558 ffor of the well, this is the fyn,
1559 In world is noon so clere of hewe.
1560 The water is evere ffresh and newe
1561 That welmeth up with wawis bright
1562 The mountance of two fynger hight.
1563 Aboute it is gras spryngyng,
1564 ffor moiste so thikke and wel likyng,
1565 That it ne may in wynter dye,
1566 No more than may the see be drye.
1567 Downe atte the botme sette sawe I
1568 Two cristall stonys craftely
1569 In thilke fresh and faire well.
1570 But o thing sothly dar I tele,
1571 That ye wole holde a gret mervayle
1572 Whane it is tolde, withouten fayle.
1573 ffor whanne the sonne, clere in sight,
1574 Cast in that well his bemys bright,
1575 And that the heete descendid is,
1576 Thanne taketh the cristall stoon, ywis,
1577 Agayn the sonne an hundrid hewis,
1578 Blewe, yelowe, and rede, that fresh and newe is.
|