1363   And almandres gret plente,
1364   ffyges, and many a date tree
1365   There wexen, if men hadde nede,
1366   Thorough the gardyn in length and brede.
1367   Ther was eke wexyng many a spice,
1368   As clowe gelofre, and lycorice,
1369   Gyngevre, and greyn de parys,
1370   Canell, and setewale of prys,
1371   And many a spice delitable,
1372   To eten whan men rise fro table.
1373   And many homly trees ther were,
1374   That peches, coynes, and apples beere,
1375   Medlers, plowmes, perys, chesteyns,
1376   Cherys, of which many oon fayne is,
1377   Notes, aleys, and bolas,
1378   That forto seen it was solas;
1379   With many high lorey and pyn
1380   Was renged clene all that gardyn;
1381   With cipres, and with olyvers,
1382   Of which that nygh no plente heere is.
1383   There were elmes grete and stronge,
1384   Maples, asshe, oke, aspe, planes longe,
1385   ffyne ew, popler, and lyndes faire,
1386   And othere trees full many a payre.