![Manuscript](../img_360/026v_360.jpg) |
1315 The daunces thanne eended were;
1316 ffor many of hem that daunced there
1317 Were with hir loves went Awey
1318 Undir the trees to have her pley.
1319 A, lord! they lyved lustyly!
1320 A gret fool were he, sikirly,
1321 That nolde, his thankes, such lyf lede!
1322 ffor this dar I seyn, oute of drede,
1323 That who so myght so wel fare,
1324 ffor better lyf durst hym not care;
1325 ffor ther nis so good paradys
1326 As to have a love at his devys.
1327 Oute of that place wente I thoo,
1328 And in that gardyn gan I goo,
1329 Pleyyng alonge full meryly.
1330 The God of love full hastely
1331 Unto him swete lokyng clepte,
1332 No lenger wolde he that she kepte
1333 His bowe of gold, that shoon so bright.
1334 He hadde hym bent anoon ryght;
1335 And he ful soone sette an ende,
1336 And at a braid he gan it bende,
1337 And toke hym of his arowes fyve,
1338 ffull sharp and redy forto dryve.
|