3139   And seide, 'Bialacoil, telle me why
3140   Thou bryngest hider so booldly
3141   Hym that so nygh the roser?
3142   Thou worchist in a wrong maner;
3143   He thenkith to dishonoure thee,
3144   Thou art wel worthy to have maugree
3145   To late hym of the roser wite;
3146   Who serveth a feloun is yvel quitte.
3147   Thou woldist have doon gret bounte,
3148   And he with shame wolde quyte thee.
3149   ffle hennes, felowe! I rede thee goo!
3150   It wanteth litel it wole thee sloo;
3151   ffor Bialacoil ne knewe thee nought,
3152   Whanne thee to serve he sette his thought;
3153   ffor thou wolt shame hym, if thou myght,
3154   Bothe ageyns resoun and right.
3155   I wole no more in thee Affye,
3156   That comest so slyghly for tespye;
3157   ffor it preveth wonder well,
3158   Thy slight and tresoun every deell.'
3159   I durst no more there make Abode,
3160   ffor the cherl, he was so wode;
3161   So gan he threte and manace,
3162   And thurgh the haye he dide me chace.