1149   And after on the daunce wente
1150   Largesse, that settith al hir entente
1151   fforto be honourable and ffree;
1152   Of Alexandres kyn was she;
1153   Hir moste Ioye was, ywys,
1154   Whan that she yaf, and seide, 'have this.'
1155   Not avarice, the foule caytyf,
1156   Was half to gripe so ententyf,
1157   As Largesse is to yeve and spende.
1158   And god ynough alwey hir sende,
1159   So that the more she yaf Awey,
1160   The more, ywys, she hadde Alwey.
1161   Gret loos hath Largesse, and gret pris;
1162   ffor bothe folk and unwys
1163   Were hooly to hir baundon brought,
1164   So wel with yiftes hath she wrought.
1165   And if she hadde an enemy,
1166   I trowe, that she coude tristely
1167   Make hym full soone hir freend to be,
1168   So large of yift and free was she;
1169   Therfore she stode in love and grace
1170   Of riche and povre in every place.
1171   A full gret fool is he, ywys,
1172   That bothe riche and nygart is.