285   And if he were so hende and wis,
286   That she ne myght al abate his pris,
287   Yit wolde she blame his worthynesse,
288   Or by hir wordis make it lesse.
289   I saugh envie, in that peyntyng,
290   Hadde a wondirful lokyng;
291   ffor she ne lokide but Awrie,
292   Or overth[w]art, all baggyngly.
293   And she hadde usage;
294   She myght loke in no visage
295   Of man or woman forth right pleyn,
296   But shette hir eien for disdeyn;
297   So for envie brenned she
298   Whan she myght any man se,
299   That fairer, or worthier were, or wise,
300   Or elles stode in folkis pryse.
301   Sorowe was peynted next envie
302   Upon that wall of masonrye.
303   But wel was seyn in hir colour
304   That she hadde lyved in langour;
305   Hir semede to have the Iaunyce.
306   Nought half so pale was Avarice,
307   Nor no thyng lyk, of lenesse;
308   ffor sorowe, thought, and gret distresse,